Atik

Brezil : Mouvman sosyal ayisyen fè tande vwa l nan Fowòm Sosyal Mondyal


lundi 2 février 2009

Pòtoprens, 02 fev. 09 [AlterPresse] --- Delegasyon plizyè òganizasyon ak rezo ayisyen patisipe nan Fowòm Sosyal Mondyal (FSM) ki fèt ane sa a nan Belem (Brezil) soti 27 janvye rive premye fevriye.

Pami òganizasyon ki reprezante, gen Platfòm k ap Plede pou yon lòt kalte Devlopman (PAPDA), Mouvman Demokratik Popilè (MODEP), Tèt Kole Ti Peyizan Ayisyen, Batay Ouvriye, Enstiti Kiltirèl Kal Levèk (ICKL) ak Solidarite Fanm Ayisyen (SOFA).

Dapre enfòmasyon patisipan yo founi bay AlterPresse, yo te mache ak plizyè postè “pou sansibilize moun nan Fowòm nan kont okipasyon ki gen nan peyi Dayiti a”.

Delegasyon an òganize epi patisipe nan plizyè deba “pou denonse sitiyasyon ki gen nan peyi Dayiti, an patikilye kesyon okipasyon an ki gen nan tèt li peyi Brezil”, dapre menm sous la.

“Anpil pwogresis Brezilyen ak militan lòt peyi te montre yo solidè ak batay kont okipasyon an epi yo pran angajman pou yo goumem, oswa kontinye goumen nan peyi yo kont okipasyon an, sitou kont prezans sòlda Brezilyen yo”, selon sa patisipan ayisyen yo fè AlterPresse konnen.

Delegasyon Ayisyen an ansanm ak divès lòt, te patisipe nan yon rankont ak 4 prezidan nan kontinan an : Hugo chavez ( Venezyela ), Evo morales ( Bolivi ), Rafael Corea ( ekwatè ) ak Fernando Lugo ( Paragwey).

Prezidan peyi sa yo te ensiste anpil sou “nesesite pou konstui yon altènativ popilè anfas agresyon peyi enperyalis yo, sitou enperyalis meriken, klas dominant yo, miltinasyonal yo ak pati politik tradisyonèl yo”.

Oganizasyon peyizan, ouvriye, fanm, jèn, sendika, etidyan, pati politik, enstitisyon edikasyon popilè nan Brezil ak divès lòt peyi nan tout kontinan yo te reponn prezan nan gwo randevou mouvman sosyal toupatou sou latè. [gp apr 02/02/09 12:15]