Atik

Ayiti/Enèji : Èske se vre pa gen ase gaz nan ponp yo ?


vendredi 30 janvier 2009

Pòtoprens, 30 janvye 09 [AlterPresse] --- Gouvènman premye minis Michèle Duvivier
Pierre-Louis ap dirije a demanti enfòmasyon ki ta fè kwè gen yon rate gaz sou mache
ayisyen an, malgre chofè machin gen anpil difikilte pou rive jwenn pwodui sa depi kèk jou.

Daprè sa gouvènman an fè konnen, gaz ki nan ponp yo sifi pou bay popilasyon an sèvis
jiskaske yon lòt kagezon petwòl rive nan peyi d Ayiti nan finisman semèn nan.

Depi semèn pase a, gwo bri t ap kouri nan Pòtoprens pou fè konnen gaz la pral ra. Anpil chofè piblik kou prive pa t pran tan pou t al fè ti pil gwo pil nan estasyon gaz yo yon mannyè pou te ka foul tank yo.

Anpil ponp gaz te ralanti sou kantike yo abitye vann, menm jan sa te fèt deja nan kòmansman mwa janvye a kote li te difisil pou yon moun te jwenn yon ti gout gaz
achte.

Gouvènman an te chita pale jounen madi 27 janvye 2009 ak responsab
konpayi k ap vann pwodui petwolye yo nan peyi d Ayiti.

Apre rankont sa, gouvènman fè konnen gen ase gaz sou mache pou satisfè tout moun.
Li anonse yon bato gaz dwe rive nan Pòtoprens nan dat 31 janvye a pou ranfòse kantite ki gen deja.

Daprè sa responsab asosyasyon mèt ponp yo fè konnen, se sèlman gazolin 91 la ki poze pwoblèm akoz se li yo plis itilize. [do gp apr 30/01/2009 01:30]