Haiti
Atik

Ayiti : Sispann masakre lang Kreyòl la


Ekri jou madi 28 oktòb 2008

Pòtoprens, 28 oktòb 08 [AlterPresse] --- Nan okazyon jounen lang ak kilti kreyòl 28 oktòb sa a, plizyè espesyalis panse denonse yon masak yo di k ap fèt sou lang kreyòl la, ki se patrimwàn pèp ayisyen an ak lòt popilasyon nan zòn Karayib la ak oseyan endyen.

Carol Joseph ki okipe pòs Sekretè d Eta pou alfabetizasyon nan peyi d Ayiti ak Jounalis Sony Estéus k ap dirije Sosyete animasyon ak kominikasyon sosyal (Saks) panse masak sa a fèt nan fason yon latriye moun ekri epi pale lang kreyòl la san yo pa respekte règ li.

Pou antwopològ Suze Mathieu, leta poko fè yon travay ki gen nannan pou pèmèt Kreyòl
la layite kò l nan peyi a. Se sèlman konstitisyon 1987 la ki bay lang Kreyòl la jarèt nan nivo Leta daprè Suze Mathieu ki chita sou travay pwofesè Yves Dejean fè nan sans sa.

Kreyòl la se trannsenkyèm lang yo pi pale sou latè, daprè espesyalis yo.

Se nan dat 28 oktòb 1982 yo te selebre pou premye fwa jounen entènasyonal lang ak
kilti kreyòl, apre yon antant peyi Karayib yo ak Oseyan Endyen yo te jwenn nan tèt
kole ak òganizasyon Nasyon zini pou edikasyon, syans ak kilti.

26 lane apre, yo kontinye selebre jounen sa divès kote sou latè. Nan peyi d Ayiti, plizyè aktivite reyalize pou make dat sa, menm jan sa fèt nan Monreyal kote Komite entènasyonal pou pwomosyon Kreyòl ak alfabetizasyon (KEPKAA) tanmen depi yon mwa aktivite sou selebrasyon jounen 28 oktòb la.

Semèn ki sot pase a, ministè kilti ak kominikasyon te òganize yon seminè fòmasyon
pou jounalis ayisyen yo kab sèvi pi byen ak zouti sa.

Jounen 28 oktòb la, SAKS òganize yon konferans deba nan Biwo nasyonal etnoloji kote
pwofesè Jean Yves Blot ak mizisyen Wilfrid Lavaud debat sou “Rasin tradisyon
kreyòl ak anviwònman”.

Aktivite SAKS yo ap rapouswiv nan Fondasyon konesans ak libète jounen 31 oktòb 2008
la ak yon banbòch kiltirèl.

Gen aktivite ki fèt tou nan Fakilte lengwistik aplike ki se yon branch nan Inivèsite Leta Ayiti.

31 oktòb, ekriven Georges Castera gen pou pran lapawòl nan “Vandredi literè”, yon
aktivite entèlektyèl ki fèt chak vandredi nan Inivèsite Karayib sou Dèlma.

Semèn ki sot pase a, se te ekriven Franketienne ki te envite nan aktivite sa a kote li
te pale sou liv li “Dezafi”, ki se premye woman ki ekri nan lang Kreyòl. [do gp apr
28/10/2008 10: 00]