Ti chèz ba

Ayiti-Brezil : Nan okazyon vizit Lula, Batay Ouvriye mande “jouk ki kote pouvwa anba titèl sa a ap rive ?”


mercredi 28 mai 2008

Kominike Batay Ouvriye

Dokiman sa a vin jwenn AlterPresse 27 me 2008

Nou te deja denonse kouman nan mwa pase a lapolis te eseye anpeche nou manifeste, kote jouk premye me se ak anpil pwoblèm nou te resi pran lari. Nan semèn pase yo, pandan nou t ap egzije pou ministè Afè Sosyal pèmèt nou touche prestasyon legal yon kapitalis dwe nou, yon gang ministè a atake nou e 2 nan kamarad nou yo jwenn arestasyon kote yo pase yon semèn ilegalman nan prizon. Se anpil manifestasyon ak demach pwotestasyon ki pèmèt yo jwenn liberasyon yo. Jounen jodi a, ankò, se kategorikman yo anpeche nou jwi dwa “demokratik” nou yo.

Vreman vre, prezidan peyi Brezil la, Ignacio Lula da Silva, ap vini mèkredi 28 me pwochen an pou vizite twoup okipasyon li yo ansanm ak prezidan Ayiti a, René Préval.

Kòm nan Batay Ouvriye nou pa dakò ak prezans twoup sila yo ni ak pwojè lespwatasyon san limit enpeyalis yo ansanm ak boujwa yo vle blayi sou do nou e ke twoup okipasyon yo, bazikman, se pwojè sa a yo vin garanti, nou te planifye fè yon sitin devan palè a pou fè prezidan Brezil la konnen pozisyon nou. Lapolis refize kategorikman bay otorizasyon ! Lè nou di nou pral fè sitin la anba kyòs la, yo toujou di non. Menm lè nou di n a prale devan ministè Afè Etranjè oswa devan anbasad Brezil lan : menmman ! E, fwa sa a, ak menas represyon klè !

Pandan n ap denonse ak tout fòs nou sitiyasyon baboukèt k ap blayi sou nou an, nòt pou laprès sa a se pou mete popilasyon an okouran represyon k ap fèt sou moun ki pa asepte pliye yo anba okipasyon an.

Pòtoprens, madi 27 me 2008

Pou Batay Ouvriye

Yannick Etienne