Atik

Ayiti ap tann yon lòt premye minis


samedi 19 avril 2008

Pòtoprens, 19 avr. 08 [AlterPresse] --- Ayiti ta sou wout pou l gen on
lòt gouvènman apre ekip Jacques Edouard Alexis a te fin pran kanè nan
men senatè yo, jounen samdi 12 avril 2008 la.

Pwofesè Micha Gaillard, pòtvwa pati Fizyon sosyodemokrat yo, anonse
deziyasyon premye minis tounèf la pou wikenn sila.

Daprè aktè politik yo ak sosyete sivil la, Premye minis sa pral gen pou fòme yon gouvènman ki bay revandikasyon mas popilè yo anpil enpòtans.

Pandan tout semèn lan, konsiltasyon bò kote prezidan René Préval ak
responsab politik yo t ap rapouswiv nan lide pou rive mete sou pye
ekip tounèf sa k ap gen pou pran bak peyi a.

Ayiti dwe nonmen yon premye minis prese prese pou fòme yon gouvènman
ki pral travay nan enterè mas pòv yo, daprè Hédi Annabi, majòjon
Misyon Nasyon Zini pou estabilite peyi d Ayiti (Minista).

Chèf sivil misyon loni a kwè priyorite gouvènman sa a se ta dwe ede
popilasyon an ki nan grangou, pandan l ap travay pou tabli baz pou
pèmèt peyi a vanse sou chimen devlopman.

Apre yon semèn leve kanpe nan peyi d Ayiti, 16 senatè sou 17 ki te
prezan nan seyans 12 avril la te chavire gouvènman Jacques Edouard Alexis. Senatè sa yo te pran nòt sou zak kraze brize ki te fèt nan Pòtoprens ak nan vil pwovens yo pandan manifestasyon kont lavichè yo.

Pou pi piti, 6 moun te jwenn lanmò yo pandan leve kanpe sa. Yon
polisye nijeryan nan Minista te mouri anba bal jounen samedi 12 avril
la nan zòn Katedral Pòtoprens.

Hédi Annabi fè konnen gen 15 sòlda Minista ki te blese pandan mouvman
pwotestasyon sa.

Bò kote pa l, òganizasyon Medsen san fwontyè te bay plis pase 160
blese laswenyay. Pami moun sa yo te gen 44 ki te blese ak bal. [do apr
19/04/2008 12 :20]