Atik

Ayiti / Kiba : Omaj pou defen Gérard Pierre Charles


jeudi 20 décembre 2007

Kolaborasyon espesyal Anna Kovac

Laavan (Kiba), 20 des. 07 [AlterPresse] --- Madi 18 desanm 2007 la, nan Linivesite Laavan (Kiba), nan sal Varona, yo te rann omaj bay entelektyèl ak ansyen dirijan politik ayisyen Gerard Pierre Charles nan memwa li nan okazyon 72 zyèm anivèsè depi li te fèt.

Se Pwofesè kiben Digna Casteeda ki te dirije yon panèl 4 entelektyèl kiben-Aurelio Alonso, Visprezidan Casa de las Americas, Fernando Martinez Heredia, dirijan Sant Juan Marinello, Luis Suarez Salazar, ki se pwofesè ak Silvio Platero, visdirektè Sant etid sou Amerik la ki te chante gam Gerard.

Aktivite sa a te dire 2 èd tan kote yo te pale de Gerard kòm pwofesè, revolisyonè, militan politik. Yo te abòde zèv literati Gerard te ekri epi yo te mande pou Kiba pibliye, on lòt fwa ankò, "Cuba a la Hora del Caribe" ki te genyen pri Casa de las Americas nan 1980.

Gerard Pierre Charles te pwofesè nan inivèsite nasyonal otonom meksik la pandan 20 lane, lè li te an egzil pandan diktati Divalye yo. Misye te jwe yon wòl enpòtan nan linite fòs pwogresis ann Amerik Latin ak Karayib la.

Yo te souliyen karaktè limanis (respè ak bon konprann pou moun) ak vizyon Gerard, epi yo te fè chonje li te kandida pou Pri Nobèl lapè a.
Epitou yo te lommen non SUZY CASTOR anpil kòm konpanyèl Gerard ak kòm entelektyèl ayisyèn enpòtan.

N ap raple, nan mwa oktòb 2007, inivèsite Laavan te met sou pye yon kou inivèsite nan lonè revolisyonè ayisyen Gerard Pierre Charles, ki te yon zanmi pèp karayibeyen, latinoameriken ak mondyal, epi ki te lite, pandan anpil ane, pou nou met tèt ansanm pou byen limanite. [ak rc apr 20/12/07 14:00]