Haiti
Atik

Minis Koperasyon entènasyonal peyi Kanada ap vizite peyi d Ayiti


Ekri jou vandredi 21 septanm 2007

Pòtoprens 21 sept. 07 [AlterPresse] --- Minis Koperasyon entènasyonal peyi kanada, Beverley J. Oda, ap fini samdi 22 septanm lan on vizit apeprè 4 jou nan peyi d Ayiti. nan peyi depi mekredi 20 an pou rive samdi 22 septanm lan.

« Pou 5 ane k ap vini yo, nou pral favorize pwojè k ap pèmèt gouvènman ayisyen an ranfòse, amelyore sekirite a, epi bay popilasyon an posiblite pou jwenn sèvis baz yo ak bon jan kondisyon lavi nan peyi d Ayiti », dapre sa Madan Oda deklare.

Ak Prezidan Rene Preval, Premye Minis Jacques Edouard Alexis ak lòt manm gouvènman yo, minis koperasyon entènasyonal peyi Kanada a te diskite sou angajman peyi kanada te pran pou reponn bezwen prese prese peyi d Ayiti genyen nan zafè devlopman.

« Peyi Kanada fè plizyè envestisman nan sans sa a deja », dapre sa l presize.

Reprezantan peyi kanada a, ki rive an Ayiti depi mèkredi 20 septanm nan, pwofite de vizit li a pou fè on bilan sou èd Kanada bay nan peyi a.

Madan Oda vizite tou kèk pwojè Ajans kanadyenn pou devlopman entenasyonal (ACDI) ap mennen nan peyi a, dapre sa enfòmasyon ajans sou entènèt AlterPresse jwenn. Li te chita pale ak reprezantan lokal plis patnè ACDI yo, ki nan sante, edikasyon, devlopman sosyal, nan Pòtoprens, Ansavo (Sidwès) ak Jakmèl (Sidès). [kj rc apr 21/09/2007 13 :30]