Atik

Ayiti-Kriz politik : Lanbi rasanbleman nan yon sosyete ki « kraze miyèt moso »


samedi 2 octobre 2021

Gotson Pierre

Pòtoprens, 2 oktòb 2021 [AlterPresse]— Sosyològ Berthony Pierre-Louis, pwofesè nan inivèsite, atis angaje ki chante rezistans pèp ayisyen nan divès moman, sonnen lanbi rasanbleman nan yon « sosyete ki kraze miyèt moso ».

Si ti rès aktè konsekan ki rete nan nivo sosyete sivil ak bò kote aktè politik yo pa chèche rive nan yon antant, sosyete a ap fin depafini e « n ap fini pa tounen anyen nèt ».

Demach kontinye ap fèt pou rive jwenn yon pasaj pou Ayiti ki antòtye nan kriz. Dènye mouvman ki fèt la a, se vizit yon jounen (30 septanm) sekretè d Eta adjwen ameriken pou tout kesyon ki konsène rejyon Amerik la. Brian Nichols te la ansanm ak prensipal direktè Konsèy sekirite nasyonal Etazini, Juan Gonzalez, pou diskite ansanm ak oorite gouvènman an, reskonsab politik ak reskonsab òganizasyon nan sosyete sivil la.

Anvan mesye yo ale, yo fè konnen aktè yo rankontre yo montre volonte pou chita epi rive nan yon sèl akò.

Sa mande pou yon moun byen suiv kouman sa pral fèt, piske plizyè akò ki genyen yo sanble klete, e sitou, gen yonn nan yo, akò 11 septanm ant premye minis defakto a, Ariel Henry, ak ansyen pati ak regwoupman anfas pouvwa tèt kale a, ki deja tounen dokiman ofisyèl apre piblikasyon li nan jounal ofisyèl Le Moniteur.

Dirijan ameriken an pwomèt gen lòt delegasyon peyi Etazini ki pou komntinye fè lanavèt an Ayiti, k ap viv yon kriz ki tèlman mangonmen, ansyen anvwaye espesyal ameriken, Daniel Foote, blije demisyone ak fraka, akòz konpotman dominan li repwoche peyi li. Jounen jodi a, ofisyèl ameriken ki le vizite peyi a, eseye konvenk Ayisyen yo, Etazini pap chèche fè balans la panche ankenn bò.

Bò pa yo, plizyè aktè ki te patisipe nan diskisyon yo di yo defann lide yon solisyon ayisyen pandan yo pwopoze pou Ameriken devlope yon lòt kalte koperasyon (nouvo deal) ak Ayiti.

Pwoblèm politik yo grefe sou yon sitiyasyon jeneral ki konplike anpil tou, patikilyèman akòz vyolans gang yo ak ensekirite a. Lè se pa nan Kwadèbouikè gang bay demonstrasyon, se nan Matisan… Ainsi de suite. Lapolis poko kab rive enpoze l. [apr 02/102021 10:00]