Haiti
Atik

Jwèt makawon an Ayiti : « Bagay la melanje, Ginen yo tètanba »


Ekri jou sanmdi 18 septanm 2021

Par Gotson Pierre

Pòtoprens, 18 septanm 2021 [AlterPresse] --- Jwèt makawon jwe nan dènye jou sa yo nan dosye politik ak jiridik an Ayiti, kote, jan chante a di : « bagay la melanje, Ginen yo tètanba ».

Semèn nan fini ak ranplasman Mèt Rockfeller Vincent nan tèt ministè jistis la. Se minis enteryè gouvènman defakto a, Liszt Quitel, ki nan pòs la pou yon ti bout tan.

Mèt Vincent t ap apiye ansyen komisè gouvènman an, Mèt Bed-Ford Claude, ki te mande pou enkilpe premye minis Ariel Henry, li di ki ta mele nan sasinay ansyen prezidan Jovenel Moïse, 7 jiyè pase a. Rezon an, sè ke jou sa a, Ariel Henry te pale 2 fwa ak Joseph Badio y ap chèche kòm prensipal moun yo sispèk ki ta lotè krim nan.

Ariel Henry revoke epi ranplase komisè gouvènman.

Ansyen minis jistis Mèt Camille Leblanc jistifye desizyon sa a ki vini twò ta, dapre li. Nan magazin #TiChèzBa sou AlterRadio 106.1 FM, li denonse sa l rele itilizasyon politik fonksyonè lajistis yo ap fè ak yon dosye jiridik.

Bò pa li, detan li lonje dwèt tou sou Ariel Henry, ansyen sekretè jeneral konsèy minis yo, Renald Luberice, demisyone.

Men akizasyon yo fè kont li yo « grav » epi yo pa chita sou anyen, dapre yon lèt esplikasyon Ariel Henry pibliye.

Se yon gwo lòbèy ki pete nan kan pouvwa a, jistan kèk wo fonksyonè rive fòme gwoup pa yo, yo rele jovenelis. Yo reklame eritaj politik Jovenel Moïse.

Ki plan ki dèyè gwo lòbèy ki sal imaj premye minis defakto a sou sèn entènasyonal la, menmsi li gen api fòmèl Core group?

Delozay sa a lage gwo konfizyon tou, sitou nan menm moman an, prezidan ti rès sena a, Joseph Lambert, t ap prepare l pou antre nan palè a kòm prezidan pwovizwa. Se kominote entènasyonal la ki di l pinga, dapre laprès etranje.

Kouman nou kab demele politik ak lajistis nan kontèks jodi a, an Ayiti, kote sekirite ak vyolans pa sispann pran lòt nivo, san lapolis pa janm montre kapasite pou pwoteje popilasyon an, k ap sibi zak gang san rete? Pandan tou, lamizè ap vale teren nan yon peyi k ap fin delabre, yon peyi ki anba yon kriz imanitè ki kab pran dimansyon nou pa imajine. [gp apr 18/09/2021 13:00]

Foto apati fim videyo