Haiti
Atik

Ayiti : Ki kote pati ki fè akò ak Ariel Henry yo kanpe?


Ekri jou sanmdi 11 septanm 2021

Gotson Pierre

Pòtoprens, 11 sept. 2021 [AlterPresse] --- Semèn nou fèk viv la a, se yon lòt etap degrenngolad tout boulin, nan kriz k ap souke peyi a, malgre anons ki fèt sou demach antant ant premye minis defakto a, Ariel Henry, ak yon bon pati nan ansyen opozisyon politik anfas rejim tèt kale a.

Jan nou abitye di, alyans ap fèt, alyans ap defèt, piske sèten sektè politik, ki te kanpe sou menm bit, ap fè wout depaman, kit ou pran l nan nivo pouvwa a, kit ou pran l nan nivo pati ki pa sou pouvwa, oubyen ki pa alye pati ki sou pouvwa a.

Menm kote a tou, gen 2 gran tandans paralèl k ap devlope. Yon bò, se demach sosyete sivil la, ki rive akouche yon akò sou baz ripti/koupe fache ak kalite gouvènans epi oryantasyon tètanba dènye ane yo, tandiske potekole ki fèt ak Ariel Henry a parèt kadre ak sa yo ta rele yon kontinite, kote yo dakò pou rapousuiv tout gwo chantye tèt kale, yo t ap konteste yo.

Ajoute sou kriz politik la, sanble ansasinay ansyen prezidan defakto Jovenel Moise ta ka sèvi tankou yon enstriman pou enfliyanse sèn politik la. Antouka analiz k ap fèt, sou jan dosye a ap avanse oubyen p ap avanse, montre politik ta melanje nèt nan dosye jidisyè a.

Menm jan an tou, eleman ensekirite a ta gen dwa gen rapò ak pèspektiv politik kèk sektè ta vle enpoze oubyen ekate nan jou k ap vini yo, yon fason pou pouse pwòp jwè pa yo sou teren an.

Semèn k ap vini yo, èske y ap pote apèzman oubyen plis tire lobe, plis kè sote ak plis dlo nan je? [gp apr 11/09/2021 04:00]