Haiti
Ti chèz ba

Konbit òganizasyon politik, sendikal ak popilè yo mande solidarite popilasyon an, pou pote kole bay gran Sid peyi d Ayiti a


Ekri jou mèkredi 18 out 2021

Dokiman sa a vin jwenn AlterPresse 16 dawout 2021

Katastwòf sou katastwòf : gran Sid la pran kou

Se ak anpil tristès, Konbit òganizasyon politik, sendikal ak popilè yo desann li byen ba, pou voye senpati l bay tout moun ki viktim tranbleman tè 14 dawout 2021 an. Jan nou konnen li, yon kokenn chenn tranbleman tè mayitid 7.2 frape rejyon Sid la, patikilyèman depatman Sid, Nip ak Grandans. Plizyè santèn moun mouri, anpil moun blese epi anpil kay kraze oubyen andomaje.

Tranbleman tè sa a rive nan moman, kote peyi a anba yon katastwòf politik, ekonomik ak sosyal, ki se rezilta politik enperyalis la, klas dominant yo ak politisyen restavèk yo, sitou rejim Pati ayisyen tèt kale a (Phtk), mennen nan peyi a.

Katastwòf sa a, se tou rezilta gagòt Bil Clinton, Jean Max Bellerives ak alye yo nan Cirh la te fè nan lajan rekonstriksyon peyi a, apre gwo tranbleman tè 12 janvye 2010 la, ki te touye anviwon 300 mil moun epi lage plis pase yon milyon moun nan lari, san kay pou yo rete.

11 lane apre tranbleman tè 12 janvye 2010 la, anviwon 11 milya dola gagote, alòske peyi a paka pran 3 gout lapli, alewè pou siklòn ak tranbleman tè.

11 lane apre, plizyè milye moun ki te viktim pa gen kay pou yo rete.

Sitiyasyon malouk peyi a, se tou rezilta gagòt lajan PetwoKaribe a. Plis pase 4 milya dola vèt gagote, pa gen menm yon bon lopital ki konstwi. Petwo mafia, depi nan Préval rive nan Tèt Kale ki chanpyon nan vòlò, dezabiye peyi a nèt. Yo met peyi a toutouni. Pèp la nan plis mizè, pandan kont bankè yo ak chanm lakay yo chaje ak dola vèt.

Konbit la lanse yon karavàn solidarite nan mitan popilasyon an pou ede gran Sid la.

Nan sans sa a, nou salye apèl solidarite Unnoh, ki se manm KONBIT la, ak plizyè lòt òganizasyon deja lanse.

Nan moman peyi a pa gen otorite, pa gen gouvènman, pa gen prezidan, mouvman solidarite a nesesè pou ede konpatriyòt nou yo.

Men li enpòtan tou pou fòs politik yo ak aktè nan sosyete sivil la degaje yon lidèship nan tèt ansanm, pou mete nan tèt Leta a yon seri otorite kredid epi responsab, ki gen lejitimite pou pote repons kòrèk epi dirab, pou fè fas ak katastwòf natirèl ak politik peyi a ap viv jounen jodi a.

Viv bonjan solidarite nan mitan pèp la !

Viv lit pèp la !

Pou Konbit la,

Josué Mérilien

Jean Paul Bastien

Guy Numa

Patrick Joseph