Haiti
Atik

Dominique de Villepin, nouvo premye minis Lafrans


Ekri jou mèkredi 1e jen 2005

Pari, 01 jen 05 [AlterPresse] --- 2 jou aprè Fransè yo fin jete referandòm pou Trete konstitisyon Lewòp la, Prezidan Jacques Chirac nonmen Dominique de Villepin kòm Premye minis Lafrans. De Vilepin pran plas Jean-Pierre Raffarin qui renmèt demisyon li maten an bay chèf Leta a.

Dominique de Villepin se ansyen sekretè jeneral nan palè prezidansyèl Lafrans (palè Elyze), sòti 1995 rive 2002. Daprè anpil moun, se li menm ki te konseye Jacques Chirac pou l kraze palman an nan lane 1997, e la dwat ta pral pèdi eleksyon yo an aprè.

Men se nan lane 2003 yo pral vin konnen Dominique de Villepin, kòm chèf diplomasi Lafrans. Lè sa, misye t ap defann douvan Nasyon Zini pozisyon peyi Lafrans kont lagè Meriken te deside al fè an Irak. De Villepin okipe pòs minis Zafè etranjè Lafrans jouk mwa mas 2004. Pandan li te nan pòs sa, de Villepin te jwe on gwo wòl nan demisyon Jean-Bertrand Aristide e nan mete rejim lavalas la deyò sou pouvwa a an Ayiti.

De Villepin te prevwa fè on vwayaj an Ayiti, nan dat 1e avril 2004, men kèk jou anvan li te vin jwenn pòs minis enteryè gouvènman Jean-Pierre Raffarin an. Se dènye jòb li okipe jiska madi 31 me a, dat li vin Premye minis Lafrans.

Nominasyon ansyen nimewo 2 gouvènman Raffarin an nan tèt Matignon (biwo gouvènman an) se pa on sipriz. Dominique de Villepin trè pwòch Jacques Chirac. Gwo sipriz la se retou Nicolas Sarkozy nan gouvènman an. Prezidan pati Inyon pou on Mouvman Popilè (UMP) ka rejwenn pòs minis enteryè li te okipe nan gouvènman an.

Nicolas Sarkozy ak Dominique de Villepin se lèt ak sitwon. Men Sarkozy se moun nan la dwat ki pi popilè an Frans. E fwa sa, sanble yo ap nonmen li minis deta, sa vele di li ap nimewo 2 gouvènman Villepin an, pandan li ap rete nan tèt pati a. Nominasyon sa ap vin mete bout nan prensip Jacques Chirac toujou ap defann kòm kwa moun pa gen dwa gen plizyè jòb an menm tan. Se 2 jen an y ap pibliye lis gouvènman an o konplè.

N ap fè sonje, nan lane 2004, Prezidan fransè a te kenbe Premye minis Jean-Pierre Rafarin nan jòb li malgre la dwat te pèdi eleksyon ki te fèt pou eli moun nan tout rejyon Lafrans ak nan palman Lewòp la.

Aprè souflèt patizan « non » yo bay dimanch, nan referandòm pou Trete konstitisyon Lewòp la, Jacques Chirac te deklare li pran nòt kòm kwa pèp fransè a pa kontan. Chirac te pwomèt li pral bay aksyon li yo on lòt dimansyon an.

Nominasyon nouvo gouvènman an se premyè faz nan lòt dimansyon sa. Nouvèl ekip sa gen 2 zan pou fè prèv li. An 2007, se pral eleksyon prezidansyèl an Frans. Pou lagòch, kanpay la deja lanse. Se youn nan kanpay ki sanble pral pi long an Frans. [wa gp apr 01/06/05 09:00]