Haiti
Ti chèz ba

Rèl diaspora : Kowalisyon Ayisyen k ap viv aletranje mande demisyon prezidan Jovenel Moïse


Ekri jou jedi 20 jen 2019

Kominike Kowalisyon Ayisyen nan dyaspora a, ki gen siyati 50 manm kominote ayisyen nan divès peyi

AlterPresse jwenn kominike sa a 19 jen 2019

Sitwayen ayisyen responsab k’ap viv tou patou nan peyi etranje ap swiv ak anpil enterè evenman politik k’ap brase bil peyi Dayiti. Kòm ayisyen k’ap viv deyò men ki toujou rete kole ak lakay, nou panse ke li enpòtan pou nou fè pèp ayisyen an ak lemonn antye konnen pozisyon nou.

Pou komanse, Zafè 4.2 milya dola petwokaribe a ki disparèt al nan pòch mafia an Ayiti, fè nou mal anpil e bagay sa a inakseptab. Lè nou konsidere ki kantite pwoblèm ki te ka rezoud ak lajan sa a. Tankou pwoblèm lasante, pwoblèm edikasyon, pwoblèm wout, pwoblèm pwodiksyon agrikòl, pwoblèm chomaj, pwoblèm ensekirite, pwoblèm sanitasyon...elatriye.

Lè nou konsidere ke 4.2 milya dola sa a se pa yon kado pèp Venezwelyen te fè ak pèp ayisyen an, se yon lajan ke pèp la tou patou dwe ranbouse san manke yon santim, nou vin 4.2 milya fwa pi fache toujou.

Zafè $1.50 ak 5 santim gouvènman pran sou tout apèl telefonik nou yo eke jiskaprezan pa janm gen okenn rapò ki pibliye sou sa. Bon enfòmasyon sekrè ke nou genyen ki sòti nan ministè finans, di ke pou lane 2018 la gouvenman ayisyen resevwa 340 milyon dola. Lajan sa a ale dwat dirèk sou yon kont ke la prezidans genyen. Kidonk, 340 milyon dola sa a fè menm wout kwochi ak 4.2 milya dola petwokaribe a.

Nan sans sa a, Nou dakò san rezèv ak revandikasyon kont kòripsyon pèp ayisyen an. Paske si ekonomi peyi a chanje sa t’ap bon pou nou ki ap viv a letranje. 3.2 milya dola ke diaspora a voye nan peyi a pou lane 2018 la t’ap rete nan pòch nou. Kidonk, nou rete makonnen ak tout goumen ki gen objektif chanje lavi nan peyi a.

Nou sipòte ak tout fòs nou tout mobilizasyon k’ap fèt nan tout peyi a kont koripsyon, diktati.

Kowalisyon Ayisyen nan Diaspora a Jounen jodi a, ayisyen bezwen prèske 100 goud pou ka gen 1 dola meriken. Gang ki gen tout kalite zam nan men yo pran pèp la kòm otaj li, ayisyen ke lapolis ak gang ap asasinen chak jou, san nou pa bliye grangou ak mizè ki ogmante anpil anpil nan peyi a. Nou gen santiman ke peyi Dayiti pa gen gouvènman k’ap dirije. Se yon bann fotokopi ak koken ki sou pouvwa ki pa gen okenn lanmou nan kè yo pou peyi a.

Nan sans sa a, diaspora a konprann kri pèp la ki mande pou prezidan enkilpe Jovenel Moise kite tèt pouvwa a, demisyone. Nou dakò ak pèp, n’ap lanse yon apèl patriyotik ba prezidan an pou kite pouvwa a prese prese.

N’ap denonse ak tout fòs nou zak kriminèl k’ap fèt sou pèp la k’ap revandike dwa yo pasifikman nan peyi a.

N’ap mande pèp la kontinye mobilize pou chanje peyi a, n’ap ba’w tout sipò k’ap pèmèt nou jwenn rezilta pozitif pou peyi a.

Solidarite ak bon jan inite nan mitan diaspora a pou chanje sistèm nan!

Viv Ayiti, aba vòlò ak asasen!

Men reprezantan ki andose not pou dyaspora a:

1-New York : Roland Sainristil, Thomas SaintCloud, Rony Monestime, Roland Sainristil, Fred Joseph, Edens Deba, Hudson Rock

2-Florida: Jimmy Mertume, Pierre P. Frédérique, Dilavoi Nozile Theobale, P Paul Jean Enoch Sainca, Jean Eli Hughes, Girard Marthe Brun, Daniel Eugene, Kowalisyon Ayisyen nan Diaspora a

3-New Jersey: Bernier Archille, André Lozier Claudy, J Jacques Joel Romulus, Marie Josette Depeigne, Willy Depeigne, Monasse Laisseus

4-Pennsylvania: Joel Leon, Patrice Laporte, Gasner Baptiste, Quener Joseph

5-Massachusetts: Tina Lorquet, Claude Janvier, Claudette Fortune, Samuel Quesse, Lucner Bayas

6-Georgia: Wilder Tout-Puissant, Engrand Émérite

7-Washington: Pierre Richard Charles, Jacques Bingue

8-Rhode Island : Jeremy Laventure, Patrick Grandroit

9-République Dominicaine: Cadet Wilgueson, Joseph Ylrick, Jean Remy Hilaire, Sony Nicolas

10-Canada: Norma Forte Beauvais, Frantzy Milien, Yvener Jean, Livette Praslin

11-Chili: Sondes Thermidor, Cenaval Cadet

12-France: Solon Maignant

13-Guyane Française: Kenold Lorquet

Ak anpil lòt non.....

Kowalisyon Ayisyen nan Diaspora a