Haiti
Atik

Ayiti-Ensekirite : 2 polisye viktim anba bal pandan yon diskisyon sou Channmas (Pòtoprens)


Ekri jou mèkredi 23 janvye 2019

Pὸtoprens, 23 janvye 2019 [AlterPresse]--- Madi 22 janvye 2019 la, vè 2 zè dimaten, yon polisye mouri epi yon lòt blese, anba bal yon gwoup endividi sou pi gwo plas piblik nan kapital la, Channmas, dapre sa ajans sou entènèt AlterPresse aprann.

Komisè prensipal polis nasyonal Pòtoprens la, Joël Casséus, konfime, nan kèk medya nan kapital la, enfὸmasyon sa a.

Komisè polis lan presize gen youn nan ajan yo, ki te rann dènye souf li lapoula.

Lòt viktim nan ap resevwa laswenyay sou kabann yon lopital, nan kapital la.

Polisye, ki mouri a, rele Oldensky Julmiste. Li te soti nan 28 tyèm pwomosyon Lapolis la. Julmiste t ap travay nan komisarya polis Kafou.

Cazeau Brouliste, ki soti nan 29 vyèm pwomosyon polis nasyonal lan, se non lὸt polisye an, ki viktim nan, men ki blese madi 22 janvye 2019 lan.

Viktim yo, ki te chita Channmas, ta pral tonbe nan yon gwo bouch louvri ak yon lòt endividi.

Yon ti tan aprè, endividi ki t ap diskite ak polisye yo deplase epi retounen ak plizyè lòt jèn gason ak zam. San poze kesyon, yo louvri lout zam sou de polisye yo. [emb rc apr 23/01/2019 11:50]