Haiti
Atik

Ayiti-Jistis : Revokasyon kowὸdonatè jeneral sekirite palè nasyonal, Vladimir Paraison


Ekri jou vandredi 30 novanm 2018

Pὸtoprens, 30 novanm 2018 [AlterPresse]--- Kowὸdonatè jeneral sekirite palè nasyonal, Vladimir Paraison, pa okipe pòs sa a ankò, daprè enfòmasyon direktè jeneral enstitisyon lapolis la, Michel-Ange Gédéon, bay jounal ‘’le Nouvelliste’’ mèkredi 28 novanm 2018 lan.

Vladimir Paraison jwenn revokasyon li, kòm kowὸdonatè jeneral sekirite palè a, sou demann sekretè jeneral palè nasyonal la, Jean Hilbert Lebrun, dapre presizyon Gedeon.

Kabinè enstriksyon nan Sen Mak mete yon manda pou arete Vladimir Paraison, yon an relasyon ak yon dosye trafik zam ki te debake Senmak nan lane 2016.

Se jij enstriksyon Dieunel Lumérant k ap fè ankèt sou dosye sa a nan Senmak.

Menm jan ak ansyen direktè jeneral enstitisyon lapolis la, Godson Orélus, yo site non ansyen ministè enteryè ak kolektivite teritoryal la sou prezidans Michel Joseph Martely, Réginald Delva, kòm moun ki ta konplis nan trafik zam ilegal ak asosyasyon malfektè.

Nan dat 8 septanm nan lane 2016, yo te jwenn, sou waf Senmak, soti nan peyi etranje, 150 fizi kalib 12, kalib 9, fizi kalib douz ak 2 kanon, 5 fizi M4, 15 minòt, 10 bòt, 50 kès katouch kalib 38, 4 kès katouch 9 mm, 10 kès katouch 12 milimèt. [apr 30/11/2018 10:20]