Atik

Ayiti : Yon lòt apremidi panik nan Matisan ak zòn ki pre li, akòz gang ame k ap tire lobe


jeudi 1er novembre 2018

Pòtoprens, 31 oktòb 2018 [AlterPresse] --- Moun, ki rete nan zòn Matisan, Pòtay Leyogàn ak lantouray li, kontinye ap viv ak gwo laperèz, chak jou ki pase, akoz gwoup bandi k ap koupe rache nan rantre sid kapital la, Pòtoprens. Nan fason y ap boukante kout zam san gade dèyè, bandi sa yo kontinye simen laterè sou moun nan zòn nan, dapre enfòmasyon AlterPresse ranmase.

Yon lòt fwa ankò, nan finisman jounen mèkredi 31 oktob 2018 lan, nèg ak zam, ki soti nan divès katye Pòtay leyogan, nan twoke kòn yo nan boukante bal, kreye yon sitiyasyon tansyon nan rantre wout nasyonal nimewo 2 a.

Estasyon AlterRadio rapòte plizyè enfòmasyon li jwenn bò kote kèk sitwayèn ak sitwayen k ap viv nan zòn sa yo. Sitwayèn ak sitwayen sa yo fè konnen gwo kout zam pa sispann chante nan Matisan, Vilajdedye, Pòtay Leyogan, avni Bòlòs, pou n site katye sa yo sèlman.

Gen kèk sitwayen ki fè konnen ta gen 2 moun ki pèdi lavi yo, nan zòn simityè Pòtoprens, nan finisman jounen mèkredi 31 oktòb 2018 lan.

Yon sitiyasyon, ki lakoz anpil moun, ki abite Kafou, k ap soti nan penitans yo, oblije rete pase lannwit lan kay yon pwòch yo oubyen pran wout la apye.

Sitwayèn ak sitwayen yo kritike lapolis, yo di ki pa voye okenn patwouy nan zòn latwoublay yo.

AlterPresse pa rive jwenn ni Direksyon depatmantal lwès polis nasyonal la, ni pòt pawòl enstitisyon an ; Okenn nan yo pa disponib sou telefòn yo. [apr 31/10/2018 23:00]