Atik

Ayiti : Tansyon nan Pòtoprens, 2 moun mouri


samedi 7 juillet 2018

Pòtoprens, 6 jiyè 2018 [AlterPresse] --- Omwen 2 moun ta mouri, sanble se anba bal, nan Pòtoprens, vandredi apremidi 6 jiyè 2018 lan, dapre enfòmasyon ki vin jwenn AlterPresse.

Gwo tansyon te koumanse blayi nan plizyè katye, depi bò 4 trè apremidi, apre moun yo aprann pri gaz la ap sibi ogmantasyon apati samdi 7 jiyè 2018 lan, a minui.

Kò 2 jèn gason, k ap benyen nan san yo, rete atè nan lari Tijo, nan sektè lès Pòtoprens, anba je kirye ki kanpe ap gade, dapre sa yon korespondan benevòl fè AlterPresse konnen.

Nan koumansman sware a, vandredi 6 jiyè 2018 lan, sitiyasyon an te toujou rete myèl nan kapital la, kote barikad wòch ak kawoutchou k ap boule anvayi lari yo, espesyalman nan Dèlma, Bonrepo, Pòtay Leyogàn, Kafou ak lòt katye ankò.

Sikilasyon paralize nan anpil katye epi komès fèmen.

Dapre yon nòt ofisyèl, ki sikile sou rezo sosyal yo, gouvènman an mete 85 goud sou pri gazolin nan, ki sipoze vin 309 goud, 85 goud sou pri dizel la, ki sipoze vin koute 264 goud, 89 goud sou pri kewozen nan, moun plis konnen sou non gaz blan an, ki sipoze pase nan nivo 262 goud, apati minui, samdi 7 jiyè 2018 lan. [apr 06/07/2018 19:00]