Haiti
Atik

Ayiti-Kanaval : Yon demach sitwayen tou senp, men ki gen anpil sans


Ekri jou madi 30 janvye 2018

Editoryal

Gotson Pierre

Pòtoprens, 30 janv. 2018 [AlterPresse] --- Semèn sa a, gen yon demach sitwayen, ki parèt tou senp, ki atire atansyon nou. Se refi kèk gwoup sitwayen koumanse montre devan diskou piblik devègonde, atak pou denigre moun, diskou rayisman ansyen prezidan Michel Martelly Sweet Micky ap voye monte.

Depi dènye rafal betiz ak atak vèbal li te lanse nan koumansman ane a pandan yon festival nan Henfrasa, Potoprens, sanble gen moun ki ta di se twòp atò.

Nou sonje misye pa janm rate okazyon pou grennen pawòl sal alawonnbadè, patikilyèman kont konsè nou Lilianne Pierre-Paul ak konfrè nou Jean Monard Metellus.

Èske sosyete sa a ta kòmanse fè yon ti souke kò l pou l reveye? Depi twò lontan popilasyon an aksepte twòp deriv, pami yo atitid revòltan Sweet Micky yo.

N ap fè pridans, nou pap prese kriye lamaryaj twò bèl. Nou konnen kouman pèspektiv politik kapab, nan sèten ka, dikte konpòtman moun k ap pran desizyon.

Men, nou wè yon demach nan Gonayiv ak Jakmèl ki ta kab reprezante yon ti limyè.

Nan Gonayiv, mouvman ki fèt nan kominote a ta fè majistra vil la efase non Sweet Micky sou lis gwoup mizik k ap patisipe nan kanaval lokal la.

Majistra Jakmèl la tou tande kri sitwayen vil sa a, ki di yo pa vle Sweet Micky vin sal kanaval yo a ak diskou denigreman, vyolans ak rayisman. Yo pa vle li vin kraze repitasyon yon kanaval ki tounen yon patrimwàn nasyonal epi ki fè eko nan nivo entènasyonal.

Kounye a, rete pou konnen sa ki pral pase nan Potoprens, kote kanaval la gen pou fèt soti 11 rive 13 fevriye.

Lakomin kapital la te deja montre detèminasyon l pou kwape konpòtman tèt chaje nan kanaval la, lè li te sanksyone 2 didje pandan peryòd repetisyon bann nan lari chak dimanch yo.

Eske komite kanaval Potoprens la ap kapab pran reskonsablite l pou kanaval kapital la pa tounen yon sèn devègonday, denigreman, atak pèsonèl ak ankourajman pou rayisman? [gp apr 30/01/2018 11 :00]