Haiti
Ti chèz ba

Ayiti : Lanmò senatè Turneb Delpé, « yon gwo kou pou anpil militan politik »


Ekri jou sanmdi 3 jen 2017

Mesaj senpati BOURAD nan okazyon lanmò senatè Turneb J. Delpé

Kominike sa a vin jwenn AlterPresse 2 jen 2017

Se ak anpil lapèn Pati politik Bourad pou Remete Ayiti Debou (BOURAD) aprann nouvèl lanmò bridsoukou senatè Turneb Delpé, jou 26 me 2017 la.

Lanmò senatè Delpé a rive, apre yon maladi li sipòte ak kouraj, nan yon kontèks jeneral ki pote makfabrik anpil ensètitid, anpil kè kase pou tout patriyòt konsekan. Lè nou sonje kalte kontribisyon Senatè Delpé te pote nan lit demokratik yo pou peyi a pran yon lòt direksyon, depa sa a se yon gwo kou pou anpil militan politik. Nan yon kontèks kote peyi a tou prèt pou plonje nan yon eksplozyon sosyal, prezans senatè Delpé ak eksperyans li kòm dirijan politik konsekan ta kapab itil peyi a anpil.

Avèk lanmò senatè Delpé a, se fanmi li, se zanmi li, se sektè demokratik la ak tout peyi a ki pèdi. Avèk lanmò sa a, se yon modèl angajman ak pèseverans politik ou pa jwenn fasil nan sektè demokratik ak pwogresis yo ki ale. Yon modèl reskonsab politik ki konnen enpòtans konviksyon ak sans sakrifis nan konba politik la.

Pati politik BOURAD pwofite okazyon sa a pou voye kondoleyans li bay tout fanmi ak tout zanmi defen an lanmò a plonje nan lapenn. Nan menm sans lan, Pati politik BOURAD swete tout kanmarad ak patnè politik defen an jwenn fòs ak kouraj pou kontinye batay pou lide li te konn ap defann yo.

Pòtoprens, jou ki 31 me 2017

Pou Komite Egzekitif la:

Harry JEAN
Sekretè Jeneral