Atik

Ayiti : Pa gen enskripsyon pou mete kanpe yon nouvo lame, dapre ministè defans lan


jeudi 30 avril 2015

Pòtoprens, 30 avril 2015 [AlterPresse] --- Ministè defans an Ayiti di li p ap fè okenn enskripsyon pou pran moun nan yon nouvo lame.

Li pote presizyon sa a, prèske yon semen apre degenn plizyè moun ki vle fè tèt yo pase pou ansyen militè lame d Ayiti.

Vandredi 24 avril 2015, plis pase senkant fanm ak gason, ak rad vèt oliv sou yo, te fè divès demonstrasyon egzèsis militè nan plizyè vil nan peyi a, espesyalman Okay, depatman Sid.

Depi lane 2011, gen anpil moun, ki fè tèt yo pase pou ansyen militè, ki te anvayi divès espas ak ansyèn kazèn lame, yon fason pou mande remete kanpe lame nan figi moun an Ayiti.

Michèl Mateli, ki te gen entansyon remobilize ansyen militè yo, rive voye plizyè jèn al pran fòmasyon anan peyi Ekwatè, nan Amerik di Sid.

Jèn sa yo deplòtonnen, kòm militè, depi plizyè mwa, nan Ti Rivyè Latibonit. [jep rc apr 30/04/2015 1:00]