Atik

Ayiti-Eleksyon : Gouvènman an di li gen 50 pousan nan 60 milyon dola ameriken li bezwen yo


jeudi 30 avril 2015

Pòtoprens, 28 avril 2015 [AlterPresse] --- Se sèlman 50 pousan, sou 60 milyon dola ameriken, gouvènman di li genyen nan men l, kounye a, pou òganize eleksyon yo pandan lane 2015 lan.

Premye minis Evans Paul mande kominote entènasyonal la ede gouvènman li a jwenn rès lajan, ki nesesè, pou konplete sa Konsèy elektoral pwovizwa a (Kep) bezwen pou òganize eleksyon 2015 yo.

Ayiti ta sipoze gen eleksyon pou senatè ak depite nan dat 9 dawou 2015, epi pou majistra, konsèy administrasyon seksyon kominal (Kasèk) ak prezidan dimanch 25 oktòb 2015.

Se madi 28 avril 2015 lan Konsèy elektoral la komanse tande ka kontestasyon yo. Li resevwa an tou 111 demann moun ki pa dakò yon seri lèt vin senatè ak depite. Plizyè nan demann sa yo arevwa ak kesyon nasyonalite etranje ak sa yo rele dechay, ki vle di jesyon kòrèk, san foub nan administrasyon Leta a.

Jan sa te prevwa, se jedi 23 avril 2015 lan, Kep a fèmen operasyon enskripsyon kandida pou senatè ak depite.

Gen 262 kandida ki enskri pou Sena ak 1767 pou Depite, an atandan Kep a rann piblik lis moun ki gen lese pase, pou al patisipe nan eleksyon yo prevwa fè 9 dawout 2015 lan.

Se sèlman 20 plas nan sena a ak 119 nan chanm depite a popilasyon an ap gen pou chwazi.

Nou jwenn non divès mizisyen, k ap sispann kaladya, men ki plis sanble pral enterese jwenn vòt popilasyon an nan eleksyon sa yo. [jep rc apr 28/04/2015 2:00]