Atik

Ayiti : Yon konsèy administratif pou Akademi lang kreyòl lan


vendredi 12 décembre 2014

P-au-P, 12 desanm 2014 [AlterPresse] --- Manm Akademi lang Kreyòl yo anonse yo met kanpe yon konsèy administrasyon 7 moun. Yo pran desizyon sa a, apeprè yon semenn apre seremoni ofisyèl, jedi 4 desanm 2014, kote yo pran mayèt Akademi an.

29 manm Akademi an, sou 33 li genyen, te vote nan eleksyon yo te fè 5 desanm 2014.

Jean Pauris Jean–Baptiste, Rogéda Dorcé Dorcil ak Marky Jean-Pierre, se youn dèyè lòt, prezidan, visprezidan ak sekretè konsèy administratif la.

Lòt 4 manm yo, se Michel Fréderic Degraff, Marie Jocelyne Trouillot Levy, Marie Rodny Laurent Estéus ak Pierre Michel Chéry.

Konsèy administratif sa a ap gen pou bay Akademi Lang Kreyòl lan bon jan oryantasyon, asire bon fonksyonman l epi di ki jan bidjè Akademi an ap balanse.

L ap gen tou pou bay dizon l sou règleman entèn enstitisyon sa a.

Se 33 moun, ki sòti nan divès sektè nan peyi a, ki manm Akademi Lang kreyòl lan.

Yo pral gen pou chwazi lòt moun ankò, pou fè manm Akademi a rive 55.

Akademi Lang kreyòl lan, se yon estrikti ki gen misyon pou ankouraje Leta pran bon desizyon pou fè lang kreyòl lan pran jarèt nan peyi a.

Li gen pou ankouraje pwodiksyon nan lang kreyòl lan, pèmèt lang kreyòl lan pran yon plas kòmsadwa, nan enstitisyon piblik kou prive yo, kote yo bay fransè a plis plas.

Akademi lang kreyòl lan fèt, tou, pou ankouraje rechèch syantifik nan lang kreyòl lan. [srh kft rc apr 12/12/2014 14:00]