Français

Sitwayen ak sitwayèn yo pa manje, manje bliye !

Dezyèm apèl alanasyon Pou evite tonbe nan pèlen yon lòt fwa ankò !
mardi 25 novembre 2003

Pozisyon Kòdinasyon Nasyonal k ap Plede Kòz Fanm (KONAP) sou dènye deklarasyon senatè lavalas Pierre Sonson Prince ak Dany Toussaint, ki kritike pouvwa a

25 novanm 2003

Nou gen gwo sezisman nan tande diskou senatè konteste Lavalas Dany Toussaint ak Prince Pierre Sonson, jounen jodi a.

De (2) senatè konteste sa yo rekonèt se yon sèl pouvwa k ap dirije peyi a : Pouvwa Legislatif la ak Jidisyè a pa ekziste. Yo rekonèt Lapolis pa p fè travay li ; Yo rekonèt peyi a rale yon bak sou 450 lane. Yo fè yon bann deklarasyon kote yo aksepte, tankou tout lòt sitwayen/sitwayèn, peyi a tèt anba : se krazezo, maspinay ak enjistis k ap fèt. Men konsyans yo pa pèmèt yo wè koub la kase depi nan dappiyanp ki te fèt sou eleksyon fo mamit 2000 yo ; Deblozay diri ak anpil lòt briganday, move zak malonèt lavalas fè nan peyi a pou rache yon pouvwa.

Pèp ayisyen, nou pa manje manje bliye ; nou pa vin soud, ni avèg, ni bèbè ! Kidonk, nou pa ka bliye imaj Prince Pierre Sonson, kamera jounalis te filme, annaksyon nan kraze brize ki te fèt lè fo koudeta 17 desanm 2001 an.

Pou tout rezon sa yo, nou pa ka pran pawòl senatè konteste sa yo oserye. Anvan yo toulède chanje fizi yo zèpòl, anvan yo vire kazak yo, yo dwe fè meya koulpa yo, bat lestomak yo 3 fwa, pou mande nasyon ayisyèn nan padon, dèske yo te patisipe, kosyone pandan tout tan sa a, sa Lavalas ap fè pou trennen pèp ayisyen an nan lanmè.

Si Dany Toussaint ak Prince Pierre Sonson te kwè, tout bon vre, peyi a ap viv sou yon rejim « despotico-anarchique », jan yo t ap di a, yo te dwe kite Palman an oswa itilize pwovizyon konstitisyonèl atik 185 la pou fòme yon « Haute cour de Justice », pou jije Jean Bertrand Aristide pou tout krim, abi, chimerizasyon, ki fè gouvènman li an, se yon Gouvènman à’LALWA.

Nou menm sitwayen ak sitwayèn peyi d Ayiti, nou sèmante, swasanndisètfwa sèt fwa, nou pa p pran nan yon lòt Aristid ankò ! Nou te kouri pou lapli makout ak militè, nou tonbe nan Lavalas k ap bwote nou nan lanmè. Se poutèt sa, nou di seraseta, fòk nou sispann ak pouvwa kraze zo, atoufè, Fòk Politik fèt yon lòt jan !

Pòtoprens, 25 novanm 2003

Pou KONAP

Danièle Magloire, Enfofanm

Yolette Mengual, Fanm Yo La

Yolette Jeanty, Kay Fanm

Olga Benoit, SOFA