Haiti
Ti chèz ba

Ayiti - Eleksyon : Anviwon 80 milyon dola vèt pou yon katastwòf elektoral pandan pèp la ap mouri grangou


Ekri jou madi 27 Desanm 2005

Kominike Kolektif Mobilizasyon Kont Lavichè

AlterPresse resevwa dokiman sa a 27 septanm 2005

Depi mwa avril 2005, Kolektif la tanmen yon mobilizasyon kont lavichè nan peyi a pou fòse gouvènman Bonifas/Latòti a desann pri gaz la ak pri pwodui premye nesesite yo. Pandan tout peryòd mobilizasyon yo, gouvènman an fèmen je li sou batay sa a. Klas politik la ak òganizasyon ki di yo reprezante sosyete sivil la te gen menm konpòtman ak gouvènman an. Aktè sa yo te pito kore gouvènman an k ap pran yon mas lajan sou gaz la pou peye FMI epi pou prepare yon tentennad elektoral.

Nan 80 milyon dola vèt yo prevwa pou katastwòf politik la, anviwon 50 milyon deja depanse. Plizyè miylon dola depanse pou MINUSTAH ak OEA achte machin epi lwe machinn san konte mago lajan moun ki pote non “ekspè†yo ap touche sou do pèp k ap mouri grangou. Malgre gagòt lajan ki fèt sou do pèp la swadizan pou fè eleksyon, tout moun ka konstate kominote entènasyonal la k ap mennen machin eleksyon an, CEP a k ap jwe wòl obsèvatè ansanm ak gouvènman an, antann yo pou yo mennen machin elektoral la nan kalfou tenten. Ki enterè aktè sa yo ap defann? Kolektif la kwè listwa ap gen pou l reponn kesyon sa a. Antouka, tout moun ki wè klè epi ki gen nen fen deja konstate machin sa a sou wout tonbe nan falèz. Kidonk, pandan lajan ap depanse pasi pala, pandan kamyon, chwal, fèy bwa, kay, chapo, pye kann ... ap danse anba kout tanbou eleksyon, kominote entènasyonal la, CEP a ak gouvènman an ap prepare yon katastwòf politik k ap koute pèp la 80 milyon dola vèt.

Ki moun jounen jodi a ki merite kanè?

Nan briganday k ap prepare la a, CEP a te reziyen l li bay 2 nan dividal kandida woulibè ki te vin nan pwosesis la kanè. Men anreyalite, jounen jodi a, nan kalfou nou ye la a, se tout klas politik la, kominote entènasyonal la ak gouvènman an ki merite kanè pou tentennad ak katatròf politik y ap prepare la a.

Eleksyon pa eleksyon, batay kont lavichè a ap kontinye

Malgre tout blòf kominote entènasyonal la, CEP a ak gouvènman an ap bay chak jou nan radyo pou montre yo vle fè eleksyon, sa k ap pase nan peyi a jounen jodi a, montre aklè gen yon pwojè malouk y ap prepare pou peyi a. Kolektif la kwè tout moun ki kwè nan yon Ayiti granmoun kote moun dwe viv tankou moun, dwe kale je yo devan sa k ap pase la a. Kolektif la kwè menm si otorite yo pa vle di eleksyon pa posib, li klè okenn eleksyon serye paka reyalize nan kondisyon nou gen devan je nou la a. Nan sans sa a, kit kominote entènasyonal la fè yon eleksyon katastwòf oubyen li pa fèt ditou, batay kont lavichè a ap kontinye san pran souf nan lane 2006 la. Antan Kolektif la ap evalye eksperyans batay ki sot fèt yo epi prepare pèspektiv pou 2006 la, li mande mas popilè yo pou yo rete mobilize ak je nou kale nan kriz k ap prepare la a. Tann modòd k ap vini bonè bonè pou relanse batay kont lavichè a.

Aba eleksyon pèpè, Aba lavichè Viv yon peyi granmoun

Jean Charles Evrard

Yves Barthélemy